मना मनातील आई
कविता - मना मनातील आई..!
जरी माझ्याकडे तिची पाठ आहे
तरी मला ती पूर्ण पाठ आहे
वाकली असेलही सावलीत ती
कण्याने अजून ताठ आहे......................||
दु:ख मनात कोंडिले
सुख चोहीकडे शिम्पिले
जखमेवरी दिसल्या खपल्या
अंगणात आनंदाचे सडे .......................||
स्वाभिमानी मुठ तिची
कधी उघडी झाली नाही
दारिद्र्याची झुंबरे कधी
घरात टांगली नाही ............................||
उन्हां-तान्हात वाटचाल झाली
काट्यानची पायाखाली भुई
चांदणसावली दिली तिने
दिल्या ओंजळीत जाईजुई ................||
अप्रूपाची नसे हो कहाणी
घरोघरी असते अशी बाई
डोकावून बघा आत तरी
ही तर मनामानातली आई ..............|||
सौ . मनिषा राजन कडव.
१६-ए ओमशिवमकूपा को- हौ- सो
गुरुनानक शाळेजवळ ,रामबाग -४
कल्याण (पश्चिम) - ४२१३०१
Comments
Post a Comment