मानाचा मुजरा
*मानाचा मुजरा छत्रपती शिवाजी महाराजांना*
गौरव राजांचा करु जय जय शिवराया
नसे तुमच्यावीण कोणी स्वराज स्थापाया ||धृ ||
शहाजी जिजाऊ उदरी जन्म झालासे
शिवनेरी गडावरती तुतारी वाजतसे
महाराष्ट्रावर भवानी माता प्रसन्न असे
हिंदू धर्म रक्षणार्थ शिवाजी अवतरसे ||१ ||
रामायण महाभारत गोष्टी सांगूनी
जिजाऊ साहेब करिती संस्कार शिवमनी
दादोजी कोंडदेव शिक्षण देऊनी
शिकवीती शिवबांना लढावे कसे रणी ||२ ||
मावळ प्रांतातील शूर सवंगडी जमले
करांगुली रक्ताने महादेवा अभिषेकीले
हर हर महादेव म्हणता बाहू सरसावले
स्वराज्यासाठी प्रथम तोरणा जिंकीले ||३ ||
प्रतापगडावरी अफझलखान आला
राजे भेटती त्यासी विषारी वाघनखाला
घेऊनी दूर सारिले सय्यद बंडाला
कोथळा बाहेर काढला मारून खानाला ||४||
पुण्यात शायिस्तेखान लाल महाली येता
बेसावध क्षणी त्यावरी हल्ला करता
गनिमी कावा साधून तोडियले बोटा
भयाने खान दिल्लीस पळूनिया जाता ||५||
औरंगजेबाने दिल्लीस भेटीस बोलविले
कपटाने राजांना कैदेत टाकीले
बहुयुक्तीने राजे पेटा-यात बसले
कोणाच्याही नकळत आग्र्याहून सुटले ||६||
रायगड राजगड असे स्वराज राजधानी
राज्याभिषेक केला गागाभट्टांनी
राज्याची घडी बसविली अष्टप्रधानांनी
शिवशक, शिवराजमुद्रा घडविली राजांनी ||७||
गडदुर्ग जलदुर्ग स्वराज्यी बांधियले
अध्यात्मिक गुरूंना आदराने वंदियले
तुकाराम रामदासांनी आशीर्वाद दिधले
शिवाजीमहाराज राजे रयतेचे झाले ||८||
क्षत्रिय कुलावतंस गोब्राह्मण पालक
दुष्टांचे निर्दालक सुजनांचे तारक
हिंदू धर्माचे तुम्ही होतात रक्षक
हिंदवी स्वराज्याचे तुम्ही संस्थापक ||९||
राजांना विनविते जोडोनी दोन्ही करा
सुराज्य स्थापनेसाठी पुन्हा अवतार धरा
राजा शिवछत्रपती हाच आदर्श खरा
करिते तुम्हा मानाचा मुजरा ||१०||
सौ. मनिषा राजन कडव
Comments
Post a Comment