आठवण कृष्णाची
आठवण कृष्णाची
नीलकांती रावा । वाजवितो पावा।
वृंदावनी धावा । राधिकेचा ॥
कुण्या झाडावर । कुण्या फ़ांदीवर ।
लपलेला पोर । यशोदेचा ॥
धावती पाखरे । सारी गाय गुरे ।
ऐकूनी बासरी । कृष्णापाठी ॥
सावरले तन । आवरेना मन ।
कसे संमोहन । नदीकाठी ॥
मागूनी येईल । ओढावया वेणी ।
हूरहूर मनी । किती वेळ ॥
घागर भराया । भिजवली काया ।
बिलगले पाया । मृगजळ ॥
सावळा मुरारी । गाठूनी दुपारी ।
उभा वाटेवरी । कैसा नाही ॥
घागर फ़ुटावी । बांगडी टिचावी ।
गालावर लाली । आली नाही ॥
सांगायाचे काही । बोलायाचे नाही ।
काळजाच्या डोही । काय चाले ॥
आठवण आली । भेट नाही झाली ।
पापणीचे तीर । पुन्हा ओले ॥
-- सौ. मनिषा राजन कडव
Comments
Post a Comment